Hokaai on the N2

Dit is soms maklik om dikwels verby 'n plek te ry en nooit die moeite te doen om daar te stop nie. So ry ek gereeld op die N2 tussen Albertinia en Mosselbaai, verby 'n gebou wat Boerekos adverteer.

(Moenie dat die "geen ingang" teken jou afsit nie, dit is vir die aftrek plek vir vragmotors bedoel)

Ek maak uiteindelik 'n plan om een dag daar te stop vir middagete en kan myself skop dat ek dit nie al lankal gedoen het nie. Die kos is uitstekend, ruim porsies en uitstekende waarde vir geld!

Jy kies jou hoofgereg, wat lekkernye soos frikkadelle, varktjops, lamtjops, hoenderschnitzel, of viskoekies insluit. Dan arriveer 'n houtbord met bruin en wit blikkiesbrood met konfyte, botter en kaas. Dan kom daar 6 bakkies met slaaie, ordentlike slaaie, nie kropslaai met 'n paar skyfies tamatie nie. Hierna volg 4 bakkies warm groente, regte moeite groente, groenbone met aartappel, murgpampoen met brood, kapokaartappels, ens. Laastens kry jy jou bord met jou hoofgereg op, in ons geval: 2 Stewige skywe schnitzels, 2 reuse frikkadelle met sous en 3 viskoekies.

Die maal word afgesluit met regte egte moerkoffie, sakkie en al.

As jy, die leser my nie wil glo nie, lees gerus die berig hier van Media24..dit is in die nuus..dit moet waar wees!!

Sondag middagete is so gewild, daar moet bespreek word (044 6977859 of 084 696 6362)