Circles in a forest hike. Kringe in 'n bos.

Ek vind dit baie moeilik om oor hierdie wandelroete te skryf. My oë vul met water, ek raak te emosioneel en moet elke keer opstaan en wegloop van my rekenaar.

Respek

In die woud

 

Kringe in 'n bos. Saul Barnard. Oupoot. Jane. Die bloubokkie se gal wat nie in sy kop sit nie. Dalene Matthee.

My voorgeskrewe boek op skool. 'n Skrywer wat ek bykans weekliks erens in Mosselbaai tydens my grootwordjare raakgeloop het. 'n Skrywer met siel. En wat haar siel bloot kon lê op papier.

In NP van Wyk se woorde: “My naakte siel wil sonder skroom in alle eenvoud tot jou gaan.”

Sy kon die woud met woorde teken. Ek probeer dit met 'n kamera doen. Ek slaag nie.

My keel raak alweer seer soos ek swaar sluk. Kringe in 'n bos is seker die mooiste verhaal oor 'n besondere woud met merkwaardige natuurreuse wat deur onkunde en gier vernietig is.



At the river crossing turn left to view this hidden gem

Octopus stinkhorn

 Ek raak woedend as ek deur die woud loop met die klub en hulle verby als jaag, Haastig om by hulle lewe uit te kom. Ek wil sit. Luister na die woud se stories. Inasem. Hoor. Sien. Voel.

Kringe in 'n bos wandelroete is mooier as mooi. Dit is dig groen. Orals is fungi, die skoonmakers van die woud wat in alle kleure en groottes opduik. Hulle breek plantmateriaal af en sit alles terug in die grond en begin dus die sirkel van lewe van vooraf. Navorsing dui nou dat hulle 'n rol kan speel in die genesing van kanker. Die genesing van die siel wat mens hier kry, is vir my net so belangrik.

Stap hierdie roete. Dit is net 9km. Vat jou tyd by Krisjan se Nek. Tannie  Dalene se as is hier gestrooi. Sy is nou deel van die woud. Deel van die sirkel.

Jubilee creek

Pak ekstra kos in en gaan hou piekniek by Jubilee creek. Neem die bos in. Sit en luister. Die bos het baie stories.

Search for webcams in the forest and read more about Dalene Matthee here.